रस्त्यावर खड्डा खोदला, ना सूचना फलक लावला, ना बॅरिकेड्‍स, बापलेक जखमी झाल्यानंतर पोलिसांनी घेतली मोठी ॲक्‍शन!, ठेकेदाराविरुद्ध गुन्हा दाखल, छत्रपती संभाजीनगरातील घटना

छत्रपती संभाजीनगर (सीएससीएन वृत्तसेवा) : खड्ड्यामुळे झालेल्या अपघाताला कारणीभूत ठरवून सिडको एमआयडीसी पोलिसांनी ठेकेदाराविरुद्ध रविवारी (४ ऑगस्ट) गुन्हा दाखल केला आहे. ठेकेदाराने रस्त्यासाठी खोदलेल्या खड्ड्यात दुचाकी जाऊन बाप-लेक गंभीर जखमी झाले. या ठिकाणी आवश्यक सूचनेचा बोर्ड, बॅरिकेड्स लावलेले नव्हते.

एका राजकीय नेत्याच्या भावासह मोठ्या ठेकेदाराने या रस्त्याचे काम घेतल्याचे समोर येत असून, काम घेतल्यानंतर बेजबाबदारपणे खड्डे खोदून तसेच सोडून देण्यात आल्याने या रस्त्यावर अपघात वाढले आहेत. अखेर आता ठेकेदाराविरुद्ध गुन्हा दाखल करण्यात आल्याने तरी त्‍यांची मनमानी थांबेल, पोलीस कडक कारवाई करतील, अशी अपेक्षा नागरिकांकडून व्यक्‍त होत आहे.

नक्की काय झाले?
दोन वर्षांपूर्वीच तयार केलेला व सध्या सुस्थितीत असलेला डांबरी रस्ता खोदून सिमेंट रस्ता तयार करण्यात आहे. जालना रोड, एसटी वर्कशॉप ते एमआयडीसी सिडको पोलीस ठाणे असा हा रस्ता आहे. याच रस्त्याने जगन्नाथ बाबुराव कुलकर्णी (वय ३९, रा. नारेगाव) हे १० वर्षांचा मुलगा सोहमसह २२ जुलैला रात्री ९ वाजता दुचाकीने घरी जात होते. मुकुंदवाडी येथील एसटी वर्कशॉप येथून वळण घेऊन ते फॅक्सोप्लास कंपनीच्या दिशेने निघाले.

लुपिन कंपनीच्या कॉर्नरजवळ ठेकेदाराने खड्डा खोदून ठेवलेला आहे. या खड्ड्यात दुचाकी गेली. यात जगन्नाथ कुलकर्णी व त्यांचा मुलगा गंभीर जखमी झाले. नागरिकांनी मदतीला धावून त्यांना रुग्णालयात नेले. प्रकृतीत सुधारणा झाल्यानंतर जगन्नाथ यांनी सिडको एमआयडीसी पोलीस ठाण्यात तक्रार दिली. त्यावरून पोलिसांनी या रस्त्याचे काम घेतलेल्या ठेकेदाराविरुद्ध गुन्हा दाखल केला आहे. तपास पोलीस अंमलदार पंडित चव्हाण करत आहेत.