म्‍हैसमाळमध्ये कार ४० फूट दरीत कोसळताना झाडाला अडकली; सुदैवाने वाचले ७ पर्यटक!, मध्यरात्री क्रेनने एकेकला आणले सुरक्षित वर…

By City News Desk

On 02 Aug 2024

खुलताबाद (सीएससीएन वृत्तसेवा) : मराठवाड्याचे महाबळेश्वर म्‍हटले जाणाऱ्या म्हैसमाळ (ता. खुलताबाद) येथील घाटातून बुधवारी (३१ जुलै) रात्री आठला स्कॉर्पिओ कार ४० फूट दरीत कोसळली. सुदैवाने कार झाडाला अडकली. त्‍यामुळे कारमधील ७ जण बचावले. छत्रपती संभाजीनगर शहरातील चिकलठाण्यातील काही युवक पर्यटनासाठी बुधवारी स्कॉर्पिओ कारने (एमएच १७ सीके ८०५५) म्हैसमाळला आले होते. रात्री आठला घाट उतरत असताना […]

खुलताबाद (सीएससीएन वृत्तसेवा) : मराठवाड्याचे महाबळेश्वर म्‍हटले जाणाऱ्या म्हैसमाळ (ता. खुलताबाद) येथील घाटातून बुधवारी (३१ जुलै) रात्री आठला स्कॉर्पिओ कार ४० फूट दरीत कोसळली. सुदैवाने कार झाडाला अडकली. त्‍यामुळे कारमधील ७ जण बचावले.

छत्रपती संभाजीनगर शहरातील चिकलठाण्यातील काही युवक पर्यटनासाठी बुधवारी स्कॉर्पिओ कारने (एमएच १७ सीके ८०५५) म्हैसमाळला आले होते. रात्री आठला घाट उतरत असताना पहिल्याच वळणावर त्यांची कार चालकाचे नियंत्रण सुटून थेट ४० फूट दरीत कोसळली. दरीतील एका झाडाला जाऊन अडकली. यात कारमधील सातही जण बचावले. त्‍यांनी मित्रांना मोबाइलवर कळवताच मित्र घटनास्थळी दाखल झाले.

रात्री ११ च्या सुमारास क्रेनच्या साहाय्याने सर्वांना अगदी सिनेस्‍टाइल सुरक्षित बाहेर काढण्यात आले. कारमधील कोणीही जखमी झाले नाहीत. त्‍यामुळे या घटनेची पोलिसांना देण्यात आलेली नव्हती. गुरुवारी सकाळी अकराला क्रेनच्या साहाय्याने कार दरीतून काढण्यात आल्याची माहिती खुलताबाद पोलिसांनी दिली. म्हैसमाळ घाट रस्त्याचे काम अनेक महिन्यांपासून रखडलेले आहे. आता पावसामुळे मोठ्या प्रमाणात चिखल झाल्याने हा घाट रस्ता मृत्यूचा सापळा बनला असून, आणखी मोठी दुर्घटना घडण्याआधी प्रशासनाने उपाययोजना करण्याची मागणी होत आहे.