सिडको एन १ मध्ये महाराष्ट्र बँकेच्या डेप्‍युटी मॅनेजर महिलेसोबत घडला हा प्रकार, दोघे दुचाकीवरून आले अन्‌…

छत्रपती संभाजीनगर (सीएससीएन वृत्तसेवा) : बँक ऑफ महाराष्ट्रच्या डेप्युटी मॅनेजर महिलेचे मंगळसूत्र दुचाकीवरून आलेल्या दोन चोरट्यांनी हिसकावून पळ काढला. ही घटना शुक्रवारी (२६ जुलै) दुपारी दीडच्या सुमारास सिडको एन १ मधील हार्मोनी अपार्टमेंटसमोर घडली.

या प्रकरणात अस्मिता विकास कांबळे (वय ३४, रा. हार्मोनी अपार्टमेंट, सिडको एन-१) यांनी तक्रार दिली आहे. त्‍या सिडको एन-१ मधील बँक ऑफ महाराष्ट्रच्या तीन वर्षांपासून डेप्युटी मॅनेजर आहेत. त्‍या शुक्रवारी दुपारी सव्वाच्या सुमारास बँकेतून लंच ब्रेक झाल्याने जवळच असलेल्या घरी पायी जात असताना दुपारी दीडला हार्मोनी अपार्टमेंटसमोर आल्या असता GST क्वार्टर्स समोरून दोन चोरांनी दुचाकीवरून भरधाव येत दुचाकीवर मागे बसलेल्या चोराने त्‍यांच्या गळ्यातील सोन्याचे मंगळसूत्र हिसकावले.

त्‍यानंतर दोघे दुचाकीने भरधाव निघून गेले. अस्मिता या त्यांच्यामागे पळत गेल्या. पण ते काही क्षणांतच दिसेनासे झाले. दोन चोरांपैकी एकाने लाल शर्ट व त्याच्या मागील चोराने पांढरा शर्ट घातलेला होता. त्‍यांनी अस्मिता यांचे ७० हजार रुपयांचे सोन्याचे मंगळसूत्र चोरून नेले होते. अस्मिता यांनी सिडको एमआयडीसी पोलीस ठाण्यात तक्रार दिली. त्‍यावरून पोलिसांनी मंगळसूत्र चोरांविरुद्ध गुन्हा दाखल केला आहे. अधिक तपास पोलीस उपनिरीक्षक आत्‍माराम घुगे करत आहेत.