लव्हस्टोरीला वेगळे वळण : प्रेयसीने बलात्‍काराचा गुन्हा दाखल करताच प्रियकराचा आत्‍महत्‍येचा प्रयत्‍न!

छत्रपती संभाजीनगर (सीएससीएन वृत्तसेवा) : प्रेमप्रकरण नकोसे झाल्यावर घरच्यांसोबत येऊन वाळूज एमआयडीसी पोलीस ठाण्यात बलात्‍काराची तक्रार प्रेयसीने केली. ही बाब प्रियकराला कळल्यानंतर त्‍याने विष पिऊन आत्‍महत्‍येचा प्रयत्‍न केल्याचा प्रकार समोर आला आहे. सध्या प्रियकरावर घाटी रुग्णालयात उपचार सुरू आहेत. रवी राजू मोरे (रा. आंबेलोहळ, ता. गंगापूर) असे या प्रियकराचे नाव आहे.

१९ वर्षीय प्रेयसी गंगापूरची असून, ती कुटुंबीयांसोबत राहते. ती छत्रपती संभाजीनगर शहरातील एका कॉलेजमध्ये शिकते. रवीने तिचा मोबाइल नंबर मिळवून संपर्क करत ओळख वाढवली. त्‍यानंतर दोघांत मैत्री झाली. तासन्‌तास एकमेकांसोबत बोलत होते. यादरम्‍यान दोघांत प्रेम झाले. दोघांच्या भेटीगाठी होऊ लागल्या. तो भेटायला तिच्या कॉलेज परिसरात गेला. भेटीचे फोटोही त्‍यांनी काढले. बजाजनगरच्या महाराणा प्रताप चौकातील रायगड लॉजवर तीनवेळेस दोघांत शारीरिक संबंधही आले. प्रेमाला चांगलेच उधाण आले असताना अचानक तिच्या स्वभावात बदल होऊन तिने बोलणे बंद केले.

तोपर्यंत प्रेमाच्या आहारी गेलेला रवी तिच्यासोबत बोलण्यासाठी धडपडू लागला. त्‍यासाठी दोघांत भांडणे होऊ लागली. त्‍याचा त्रास असह्य झाल्याने तिने पालकांना याची माहिती दिली. त्‍यानंतर पालकांसोबत येऊन वाळूज एमआयडीसी पोलीस ठाण्यात तक्रार दिली. त्‍यावरून पोलिसांनी रवीविरुद्ध गुन्हा दाखल केला होता. आपल्याविरुद्ध बलात्‍काराचा गुन्हा प्रेयसीने दाखल केल्याचे कळताच रवीने शनिवारी (२५ जानेवारी) राहत्‍या घरी विष पिले. त्‍याला अत्‍यवस्थ अवस्थेत कुटुंबीयांनी घाटी रुग्णालयात दाखल केले आहे. त्‍याची प्रकृती नाजूक आहे.