छत्रपती संभाजीनगर (सीएससीएन वृत्तसेवा) : प्रसिद्ध चित्रपट दिग्दर्शक, निर्माता व लेखक नीरज पांडे यांच्या आगामी बंगाली भाषेतील वेब सिरीजचे चित्रीकरण छत्रपती संभाजीनगरच्या चिकलठाणा आंतरराष्ट्रीय विमानतळावर झाले. चित्रीकरणासाठी छत्रपती संभाजीनगरचे विमानतळ हे कोलकाता येथील विमानतळ म्हणून दाखविण्यात येत असल्याने विमानतळाचे नाव बदलून ‘नेताजी सुभाषचंद्र बोस इंटरनॅशनल एअरपोर्ट’ असे करण्यात आले. बुधवारी (१८ सप्टेंबर) अचानक विमानतळाचे नाव बदलल्याने सारेच आश्चर्यचकीत झाले. पण नंतर शूटिंगसाठी असे केल्याचे कळले.
मुंबईसह अन्य मोठ्या शहरांतील विमानतळावर गर्दी असते. त्यामुळे चित्रीकरणात अडचणी येतात. त्यामुळे चित्रपट, सिरिज निर्माते आता पर्यटन राजधानी छत्रपती संभाजीनगरकडे वळत आहे. अन्य शहरांच्या तुलनेत छत्रपती संभाजीनगरच्या विमानतळावर इतकी गर्दी नसते. ही बाब हेरून छत्रपती संभाजीनगरच्या विमानतळावर शूटिंगसाठी प्राधान्य दिले जात आहे. नीरज पांडे यांच्या ‘खाकी: द बंगाल चॅप्टर’ या वेबसिरिजसाठी चिकलठाणा विमानतळावर बुधवारी दिवसभर शूटिंग करण्यात आले. यासाठी विमानतळाचे नाव बदलले होते. त्यामुळे विमानतळावर आलेले प्रवासी चकीत झाले. सकाळी ८ पासून सायंकाळपर्यंत शूटिंग चालले. चित्रीकरणातील दृश्यं गुपित ठेवण्यात आली आहेत. बंगाली अभिनेते, कलावंत आले होते. चित्रीकरणात आपले विमानतळ कोलकाताचे विमानतळ म्हणून दाखविण्यात आले.
तुम्हाला हे माहीत नसेल की, विमानतळावर शूटिंग करण्यासाठी डायरेक्टर जनरल ऑफ सिव्हिल एव्हिएशन (डीजीसीए) आणि ब्युरो ऑफ सिव्हिल एव्हिएशन सिक्युरिटी (बीसीएएस) यांची परवानगी हवी असते. शूटिंगसाठी तासानुसार शुल्क आकारले जाते. हे शुल्क तासाला ७० हजार ते ८० हजार रुपयांपर्यंत असते. यापूर्वी २८ जुलै २०२१ रोजी चिकलठाणा विमानतळावर अभिनेता मनोज वाजपेयीची प्रमुख भूमिका असलेल्या ‘डिस्पॅच’ चित्रपटाचे शूटिंग झाले होते. नीरज पांडे यांच्या वेबसिरिजच्या चित्रीकरणासाठी दिवसभराची परवानगी होती, अशी माहिती चिकलठाणा आंतरराष्ट्रीय विमानतळाचे संचालक शरद येवले यांनी पत्रकारांना सांगितले.
