अल्पवयीन मुलीवर बलात्‍कार करणाऱ्या महाराजाची कुटीच जाळून टाकली!; हतनूरची घटना

कन्‍नड (सीएससीएन वृत्तसेवा) : अल्पवयीन मुलींवर बलात्‍कार करणाऱ्या दादा महाराज अकोलकर ऊर्फ बाबा (वय ६७) याच्या हतनूर (ता. कन्‍नड) येथील वादग्रस्त माऊली वारकरी कन्या आश्रमातील कुटी कुणीतरी जाळून टाकल्याची घटना बुधवारी (११ सप्‍टेंबर) सायंकाळी ७ च्या सुमारास घडली. या कुटीतच त्‍याने १३ वर्षीय मुलीला धमकी देत बलात्‍कार केला होता. दुसऱ्या एका १४ वर्षीय मुलीवरही बलात्काराचा प्रयत्नही केला होता.

अल्पवयीन मुलीवर अत्याचार केल्याची घटना २० ऑगस्टला समोर आली होती. सध्या दादा महाराज अकोलकर पोलिसांच्या अटकेत आहेत. या आश्रमातील मुलींनी आश्रम सोडल्याने आश्रम कुलूपबंदच आहे. आश्रमाच्या बाजूला अकोलकरची कुटी होती. त्या कुटीला बुधवारी सायंकाळी सातला अचानक आग लागली. जवळपास कोणीही नसल्याने कुटी जळून खाक झाली. यात फारशा काही वस्तू नव्हत्या. घटनेची माहिती मिळताच कन्‍नड पोलिसांनी घटनास्थळी धाव घेतली. ही कुटी कुणीतरी जाळून टाकल्याची शक्यता आहे. मात्र आगीचे निश्चित कारण समोर आलेले नाही.

पाय दाबून घेतले अन्‌ केला होता बलात्‍कार…
अकोलकरच्या माऊली वारकरी कन्या आश्रमात धार्मिक व शालेय शिक्षण घेण्यासाठी १५ मुली राहत होत्या. त्या १३ ते १८ वयोगटातील होत्या. यातीलच एका १३ वर्षीय विद्यार्थिनीकडून सुरुवातीला पाय दाबून घ्यायचा. सर्व मुली झाेपेत असताना २० ऑगस्टला रात्री १२ ते १२.३० च्या सुमारास त्‍याने मुलीला झोपेतून उठवून बोलावले. तिला पाय दाबण्यास सांगितले. ती पाय दाबत असतानाच त्याने बलात्कार केला. याबाबत कुणाला काही सांगितले तर शिक्षण देणार नाही, अशी धमकी त्‍याने दिली.

धमकीला घाबरून तिने अत्याचार सहन केला. त्यानंतर त्‍याने तिच्या बाजूला झोपलेल्या १४ वर्षीय मुलीलाही पाय दाबण्यासाठी बोलावून घेत बलात्‍काराचा प्रयत्‍न केला. बाहेर आवाज आल्याचा भास झाल्याने तो उठला. ही संधी साधून मुलगी तिथून पळाली. दोन्ही मुलींनी भयग्रस्त अवस्थेत कशीबशी रात्र जागून काढली. त्यानंतर कुटुंबीयांना कळवले. कुटुंबीयांनी येऊन अकोलकरला जाब विचारला असता तो बलात्‍कार केल्याचे नाहीच म्हणत होता. त्‍यानंतर पीडितेच्या आईने कन्‍नड ग्रामीण पोलिस ठाणे गाठून तक्रार दिली होती. पोलिसांनी गुन्हा दाखल करत अकोलकरला अटक केली होती.