धक्कादायक… रागातून घराबाहेर पडलेल्या महिलेवर पडेगावमध्ये बलात्‍कार!, बेशुद्धावस्थेत रस्त्यावर पडलेली होती, पोलिसांनी धावून केले रुग्णालयात दाखल

छत्रपती संभाजीनगर (सीएससीएन वृत्तसेवा) : पतीने मारहाण केली, मुलाने पैसे घेऊन वाईट वागणूक दिली… त्‍यानंतर माहेरी पडेगावला आलेल्या ५० वर्षीय महिलेवर लैंगिक अत्याचार झाल्याची धक्कादायक घटना समोर आल्याने खळबळ उडाली आहे. महिलेवर सध्या घाटी रुग्णालयात उपचार सुरू असून, ती बोलण्याच्याही स्थितीत नाही. तिच्या अंगावर मारहाणीच्या खुणा आहेत. छावणी पोलिसांनी स्वतःच फिर्यादी होत मंगळवारी (१० सप्‍टेंबर) या प्रकरणात गुन्हा दाखल केला असून, घटनेचा सखोल तपास सुरू असल्याचे सहायक पोलीस आयुक्त महेंद्र देशमुख यांनी सांगितले.

रविवारी (८ सप्‍टेंबर) रात्री ही महिला जखमी, बेशुद्धावस्थेत पडेगावच्या रस्त्यावर पडलेली होती. नागरिकांनी कळवताच पोलिसांनी धाव घेऊन तिला रुग्णालयात दाखल केले होते. पीडित महिला जबाब देण्याच्याही स्थितीत नाही. तिच्यावर बलात्कार झाल्याचे डॉक्‍टरांनी सांगितले. सहायक पोलीस आयुक्त महेंद्र देशमुख, पोलीस निरीक्षक राजेंद्र होळकर, सहायक पोलीस निरीक्षक सुषमा पवार, पोलीस उपनिरीक्षक विकास खटके यांनी घाटी रुग्णालयात येऊन पीडितेच्या प्रकृतीबद्दल डॉक्‍टरांकडे चौकशी केली.

पोलीस अंमलदार संजय रोकडे यांनी सरकार पक्षातर्फे अज्ञात नराधमांविरुद्ध तक्रार दाखल केली आहे. ही महिला मूळची चाळीसगावची असून, काही दिवसांपूर्वी पतीने मारहाण केल्याने व मुलानेही पैसे घेऊन वाईट वागणूक दिल्याने ती रागात घराबाहेर पडली होती. ती पडेगावला माहेरी आली, पण तणावात बाहेरच फिरत होती. पडेगावातील एका दारूच्या दुकानासमोरही ती दिसून आली होती. त्याच दरम्यान रात्रीतून तिच्यावर नराधमांनी बलात्कार केल्याचा अंदाज आहे. तिची प्रकृती चिंताजनक आहे. प्रकृती स्थिर झाल्यानंतर तिची चौकशी केली जाईल, असे पोलिसांनी सांगितले.