रिक्षाचालक दारू पिऊन मोबाइल टॉवरवर चढून बसला, कारण आले समोर!, बेगमपुऱ्यातील घडली होती घटना

छत्रपती संभाजीनगर (सीएससीएन वृत्तसेवा) : बेगमपुऱ्यातील डी. के. एम. एम. महाविद्यालयासमोरील मोबाइल टॉवरवर मद्यधुंद रिक्षाचालक चढून बसला होता. काही केल्या तो उतरत नव्हता. अखेर अग्‍निशमन विभागाच्या जवानांनी त्याला सुरक्षित उतरवले. पोलिसांनी त्‍याला असे करण्याचे कारण विचारल्यावर पत्‍नी मला विचारत नाही, भाव देत नाही. त्‍यामुळे वैयक्तिक तणावातातून हे कृत्य केल्याचा जबाब त्याने दिला. सोमवारी (१४ जुलै) दुपारी ३ ते ६ दरम्यान हा प्रकार घडला.

विजय रामराव भोईर (वय ५३, रा. पहाडसिंगपुरा) असे रिक्षाचालकाचे नाव आहे. सुरुवातीला तो डी. के. एम. एम. महाविद्यालयासमोरील टॉवरजवळ बराच वेळ घुटमळला. नंतर कुणाचे लक्ष नसल्याचे पाहून टॉवरवर चढायला सुरुवात केली. नागरिकांचे लक्ष वेधले जाऊन त्यांनी आरडाओरड करत त्याला खाली उतरण्यास सांगितले. मात्र, त्याने कुणाचे ऐकले नाही. नागरिकांनी पोलिसांना कळवले. दामिनी पथकाने तत्काळ धाव घेतली. बेगमपुरा पोलीसही आले. पण तो काही पोलिसांचे ऐकेना. खूप वरपर्यंत पोहोचल्याने तिथून पडला असता तर जिवाला धोका होता.तो हातपाय सोडून टॉवरच्या अँगलवर झोपत होता. त्यामुळे तोल जाण्याची शक्यता होती. ३ तास त्‍याने अनेक जीवघेणे स्टंट करून दाखवले. अखेर अग्निशमन विभागाला पाचारण करण्यात आले. अग्‍निशमनचे अधिकारी विजय राठोड, अशोक खांडेकर यांनी जवानांसह येऊन टॉवरवर चढत त्याला सुरक्षित उतरवले. पोलिसांनी भोईरला ताब्यात घेऊन घाटी रुग्णालयात नेत तपासणी केली असता तो दारूच्या नशेत असल्याचे समोर आले. हा प्रकार केल्याचा त्याने पोलिसांना जबाब दिला. बेगमपुरा पोलिसांनी त्‍याच्याविरुद्ध गुन्हा दाखल केला आहे.