गांधीनगरातील बंगल्यावर छापा पडताच पळापळ, पोलीस म्‍हणाले, खबरदार जागचे हलाल तर…

छत्रपती संभाजीनगर (सीएससीएन वृत्तसेवा) : छत्रपती संभाजीनगर शहरातील गांधीनगरातील बंगल्यात जुगार अड्डा सुरू होता. शहर गुन्हे शाखेच्या पोलिसांनी शनिवारी (१२ जुलै) सायंकाळी पाचला छापा मारून सहा प्रतिष्ठित जुगाऱ्यांना पकडले. त्‍यांच्याकडून १ लाख ६१ हजार रुपयांचा मुद्देमाल जप्त केला आहे.

सहायक पोलीस निरीक्षक रविकांत गच्चे यांच्या नेतृत्वाखालील पथकातील पोलीस अंमलदार विजय निकम, मनोज अकोले, रियाज मोमीन, सोमनाथ दुकले यांनी ही धडाकेबाज कारवाई केली. गस्त घालत पथक औरंगपुऱ्यात आले असता त्यांना रविकांत गच्चे यांना गुप्त बातमीदारामार्फत खात्रीलायक माहिती मिळाली होती, की गांधीनगरात अनिल लाहोट यांच्या घराच्या दुसऱ्या मजल्यावरील रूममध्ये जुगार खेळत आहेत. वरिष्ठांची परवानगी घेऊन गच्‍चे यांनी छाप्याचे नियोजन केले. अनिल लाहाटेच्या मालकीच्या जागेत पाच जण पत्त्यावर पैसे लावून तिर्रट नावाचा जुगार खेळताना मिळून आले.

पोलिसांना पाहून ते हातातील पत्ते व पैसे आजूबाजूला फेकून पळून जाण्याचा प्रयत्न करू लागले. मात्र पोलिसांनी त्‍यांना जागीच थांबण्यास सांगून झडती घेतली. जागामालक अनिल दुलिचंद लाहोट (वय ४५) याच्यासह जुगारी सतिश रामपाल लाहोट (वय ३१), विकम विष्णू चावरिया (वय ३८), राकेश शिवराम चावरिया (वय ४५), दिनेश दीपक चावरिया (वय ३३), योगेश सूरजसिंह रेडलॉन (वय ४०, सर्व रा. गांधीनगर) यांच्याविरुद्ध पोलीस अंमलदार बाळू नागरे यांच्या तक्रारीवरून क्रांती चौक पोलिसांनी गुन्हा दाखल केला आहे. पोलीस अंमलदार संतोष मुदिराज करत आहेत.