रत्‍नाकर नवले छत्रपती संभाजीनगर शहराचे नवे पोलीस उपायुक्‍त, ATS ची धुरा बजरंग बनसोडे यांच्याकडे

छत्रपती संभाजीनगर (सीएससीएन वृत्तसेवा) : पोलीस अधीक्षक आणि अप्पर अधीक्षक दर्जाच्या पोलीस अधिकाऱ्यांच्या बदल्या राज्‍य शासनाने केल्या असून, यात छत्रपती संभाजीनगर शहर पोलीस उपायुक्‍तपदी मुंबईतील ‘फोर्स वन’चे अप्पर पोलीस अधीक्षक रत्नाकर नवले यांची बदली झाली आहे. आधी त्‍यांची बदली अमरावतीला झाली होती, ती रद्द करून छत्रपती संभाजीनगरला ते नियुक्‍त झाले.

छत्रपती संभाजीनगरच्या दहशतवाद विरोधी पथकाच्या (एटीएस) अधीक्षकपदी बजरंग बनसोडे यांची नियुक्ती करण्यात आली आहे. नव्या बदल्यांतमध्ये एक अदलाबदलही करण्यात आली असून, त्‍यानुसार अप्पर पोलीस अधीक्षक सुनील लांजेवार यांची राज्य गुप्तवार्ता विभागाच्या (एसआयडी) उपायुक्तपदी बदली करण्यात आली आहे. आधीच्या बदल्यांमध्ये त्‍यांची नियुक्‍ती कोल्हापूरला गुन्हे अन्वेषण विभागाच्या (सीआयडी) पोलीस अधीक्षकपदी झाली होती, तर रत्‍नागिरीच्या अप्पर पोलीस अधीक्षक जयश्री गायकवाड यांची छत्रपती संभाजीनगरला राज्‍य गुप्तवार्ता विभागाच्या उपायुक्‍तपदी बदली करण्यात आली होती. आता जयश्री गायकवाड यांची बदली कोल्हापूरमध्ये गुन्हे अन्वेषण विभागाच्या अधीक्षकपदी करण्यात आली आहे.

नवले शहराचे नवे पोलीस उपायुक्‍त
पोलीस उपायुक्त नवनीत काँवत आणि नितीन बगाटे यांच्या बदलीनंतर छत्रपती संभाजीनगर शहरातील उपायुक्तांचे पद रिक्त झाले होते. मुंबईतील फोर्स वनचे अप्पर पोलीस अधीक्षक रत्नाकर नवले हे आता शहराचे नवे पोलीस उपायुक्‍त झाले आहेत. आता शहरात पंकज अतुलकर, प्रशांत स्वामी, शर्मिष्ठा घारगे-वालावलकर आणि रत्नाकर नवले असे ४ पोलीस उपायुक्त झाले आहेत. शर्मिष्ठा घारगे आणि रत्‍नाकर नवले हे अद्याप रूजू झालेले नसल्याची माहिती अधिकारिक सूत्रांनी दिली.