भुमरेंचा चालक जावेदवर ९ तास प्रश्नांचा भडीमार, पण चौकशीत सहकार्य करेना!; १५० कोटींच्या जमिनीचे गौडबंगाल

छत्रपती संभाजीनगर (सीएससीएन वृत्तसेवा) : खा. संदिपान भुमरे आणि आ. विलास भुमरे यांचे चालक जावेद रसूल शेख यांना हैदराबादच्या प्रसिद्ध सालार जंग यांच्या कुटुंबाने १५० कोटींची जमीन भेट दिली आहे. परभणीच्या ॲड. मुजाहिद खान यांच्या तक्रारीवरून आर्थिक गुन्हे शाखेने या प्रकरणाची चौकशी सुरू केली असून, सोमवारी (३० जून) त्‍याची तब्बल ९ तास कसून चौकशी करण्यात आली. मात्र त्‍याने जमिनीसंदर्भात कोणतीही कागदपत्रे दिली नाहीत, की चौकशीला सहकार्यसुद्धा केले नाही. तो वकिलासह पोलीस आयुक्तालयात हजर झाला होता.

सालारजंगचे वंशज मीर महेमूद अली खान हे मात्र आजाराचे कारण पुढे करून चौकशीला आले नाहीत. त्‍यांनी अर्ज करून ३ दिवसांची वेळ मागितली. जावेद सकाळी ११:३० वाजता पोलीस आयुक्तालयात वकिलासह आला. पोलीस निरीक्षक संभाजी पवार यांच्यासह तीन अधिकाऱ्यांनी त्याची एकट्यात चौकशी केली. सालारजंग वंशजांसोबत नाते असल्याने जमीन मिळाल्याचा दावा त्याने केला होता. पोलिसांनी त्याला सबळ पुराव्यासह नाते सिद्ध करण्याची सूचना केली. त्याला पोलिसांनी दिलेली प्रश्नावलीतही त्‍याने समाधानकारक उत्तरे दिली नाहीत. त्‍यामुळे आज, १ जुलैला सकाळी पुन्हा चौकशीसाठी हजर राहण्याची नोटीस त्‍याला देऊन रात्री ८ वाजता सोडून देण्यात आले.

काय आहे प्रकरण…
सालारजंगचे वंशज मीर महेमूद अली खान यांनी भुमरेंकडून मोठी रक्कम घेऊन चालक जावेदच्या नावे १५० कोटींच्या जमिनीचा बनावट हिब्बानामा (दानपत्र) करून दिल्याचा आरोप अॅड. मुजाहीद खान यांनी केला आहे. काल्डा कॉर्नर येथील ही ३ एकर जमीन असून, अॅड. मुजाहिद इकबाल खान समीरउल्ला खान (रा. परभणी) यांच्या नावे आधी ९० लाख ते एक कोटी रुपयांच्या व्यवहारात जमिनीचे ॲग्रिमेंट टू सेल, नोंदणीकृत मुखत्यारनामा व हिब्बानामा करून दिला होता, असा दावा ॲड. खान यांचा आहे. एका सामान्य ड्रायव्हरला १.५ अब्ज रुपयांची भेट दिल्याने लोक आश्चर्यचकित झाले आहेत. ॲड. खान यांचे म्हणणे आहे की खासदाराच्या ड्रायव्हरचा सालार जंग यांच्या कुटुंबाशी कोणताही संबंध नाही, मग ते मौल्यवान मालमत्ता का देतील? ड्रायव्हर जावेद १३ वर्षांपासून भुमरे पिता-पुत्रांची गाडी चालवत आहे.