खडी रोडवर प्रशासन, कंत्राटदाराकडून ‘यमदेवाची स्थापना’; बळी गेल्याशिवाय काम न करण्याचा पवित्रा?

छत्रपती संभाजीनगर (सीएससीएन वृत्तसेवा) : देवळाई परिसरातील खडी रोडवर महापालिका, लोकप्रतिनिधी, कंत्राटदाराने मिळून यमदेवाची स्थापना केली आहे. बळी जाण्यासाठी खड्डे तयार ठेवले असून, त्‍यात बळी गेल्याशिवाय रस्‍त्‍याचे काम न करण्याचा पवित्रा घेतला आहे का, असा संतप्त सवाल नागरिक करत आहेत. शुक्रवारी (२८ जून) दुचाकीस्वार वाहनासकट पडून जखमी झाल्यानंतर नागरिकांचा आक्रोश वाढला आहे. नागरिकांनी ६ जुलैला रास्ता रोको आंदोलन करण्याचा इशारा दिल्याने वातावरण पेटले आहे.

रस्‍त्‍याच्या बिकट अवस्थेमुळे नागरिकांना मरणयातना सोसाव्या लागत आहेत. लोकांच्या समस्यांसाठी एरवी तत्‍पर राहणारे आ. संजय शिरसाट यांना आमच्यावरील एवढे मोठे संकट का दिसत नाही, असा प्रश्न नागरिक करताना दिसत आहेत. दुचाकीस्वार खड्ड्यात पडल्यानंतर आजूबाजूच्या नागरिकांनी बाहेर काढले. त्‍यानंतर रस्त्याची अवस्था सुधारावी, अर्धवट काम पूर्ण करावे आणि रस्ता मोकळा करावा, अशी मागणी चिकलठाणा पोलीस ठाण्यात निवेदन देऊन केली. देवळाई येथील खडी रोड सध्या चिखलाने माखला आहे. वाहने चालवणे तर दूर, पायी चालणेही अवघड झाले आहे. १९ मे रोजीही सकाळी नागरिकांनी आंदोलन केले होते. १५ जूनला नागरिकांनी उंटावर बसून आंदोलन केले होते. मात्र समस्या जैसे थे आहे.

सातारा-देवळाईचा महापालिकेत समावेश होऊनही भाग मूलभूत सोयी-सुविधांपासून वंचित आहे. दरवर्षी २० कोटींपेक्षा अधिक कर या भागातून भरला जातो. देवळाई रस्त्याला समांतर रस्ता म्हणून खडी रोड ओळखला जातो. काळ्या मातीचा हा खडी रोड ६० फुटांचा व २ किलोमीटर अंतराचा आहे. तो देवळाईला जोडतो. रस्त्याच्या दोन्ही बाजूंनी मोठ्या प्रमाणावर नागरी वसाहती झाल्या असून, गृहनिर्माण सहकारी संस्था, व्यापारी संकुल, दुकाने, शाळा असल्याने २४ तास वर्दळ असते. रस्ता प्रश्नी ठाकरे गट आक्रमक असल्याने मंत्री शिरसाट दुर्लक्ष करत आहेत का, असा प्रश्न नागरिकांना पडला आहे. काही दिवसांपूर्वी रस्त्याचे भूमिपूजन झाले होते. ४ कोटी रुपये खर्चून या रस्त्याचे काम देवळाईतीलच प्रसिद्ध ठेकेदाराला देण्यात आले. या ठेकेदाराने रस्ता खोदून ठेवला. त्यानंतर काम काही केलेच नाही. त्यामुळे खड्डे अन्‌ चिखलातून येजा करणे अवघड झाले आहे.