रांजणगाव शेणपुंजीतील धक्कादायक घटना : वहिणीच्या सोन्यावर दिरानेच मारला डल्ला!, सराफाकडे विकण्यास आला अन्‌ अडकला…

छत्रपती संभाजीनगर (सीएससीएन वृत्तसेवा) : वाळूज एमआयडीसीतील रांजणगाव शेणपुंजी येथील पवननगरात भावाच्या घरातच तरुणाने चोरी केली. कपाटातील लॉकरमधून वहिणीचे १ लाख ६० हजार रुपयांचे दागिने चोरून नेले. मात्र सराफाकडे दागिने विकायला गेला असता सराफाने पोलिसांना कळवले अन्‌ त्‍याचे बिंग फुटले. पोलिसांनी त्‍याला अटक केली आहे.

अबुजर दस्तगीर पठाण यांनी या प्रकरणात तक्रार दिली आहे. ते सहकुटुंब राहतात. खासगी कंपनीत काम करतात. १७ जूनला कपाटाच्या लॉकरची चावी हरवल्याचे त्‍यांच्या लक्षात आले. २० जूनला त्यांच्या नव्या घराची घरभरणी असल्याने दागिने घालायचे होते. मात्र चावी हरवलेली असल्याने वापरता आले नाहीत. पठाण यांना लॉकरबाबत संशय आल्याने त्‍यांनी रविवारी दुपारी लॉकरचे कुलूप तोडले. मात्र लॉकरमधील सोन्याचे नेकलेस (१० ग्रॅम), गंठण (३ ग्रॅम), अंगठी (२.५ ग्रॅम), ३० मणी (१.५ ग्रॅम) असे एकूण अंदाजे १ लाख ६० हजार रुपये किमतीचे दागिने दिसून आले नाहीत. त्‍यांनी वाळूज एमआयडीसी पोलीस ठाण्यात चोरीची तक्रार केली.

दिराला अटक
या घटनेचा समांतर तपास गुन्हे शाखेच्या पथकाने करून दिराला अटक केली. वरिष्ठ पोलीस निरीक्षक संभाजी पवार यांनी सांगितले, की मेहराज दस्तगीर पठाण (वय २०) असे संशयित दिराचे नाव आहे. घरभरणीच्या कार्यक्रमासाठी सर्व नातेवाइक जमले असताना मेहराजने लॉकरमधून वहिनीचे सोन्याचे दागिने लंपास केले. दागिने विकण्यासाठी तो एका सराफा व्यापाऱ्याकडे गेला. व्यापाऱ्यास सोन्याविषयी शंका आल्यानंतर त्याने गुन्हे शाखेच्या पथकाला कळवले. त्‍यानंतर पोलीस उपनिरीक्षक प्रवीण वाघ, अंमलदार बाळू लहरे, विजय निकम, विजय भानुसे, मनोहर गिते, कृष्णा गायके, रूपाली राणे यांच्या पथकाने मेहराजला अटक केली. त्‍याने त्‍याच्याकडे चोरलेले दागिनेही मिळून आले.