तरुणाला जातिवाचक शिवीगाळ करून जीवे मारण्याची धमकी, चौघांविरुद्ध ॲट्रॉसिटीचा गुन्हा दाखल, छ. संभाजीनगरच्या तालुक्यातील घटना

छत्रपती संभाजीनगर (सीएससीएन वृत्तसेवा) : दूध घालण्यासाठी डेअरीवर आलेल्या तरुणाला चौघांनी मिळून जातिवाचक शिवीगाळ करत लाथाबुक्क्यांनी मारहाण केल्याची घटना सोमवारी (२३ जून) सायंकाळी साडेसातच्या सुमारास चिकलठाणा पोलीस ठाण्याच्या हद्दीतील परदरी येथे घडली.

रामू विठ्ठल घोडके, चिकू रामू घोडके, नारायण तेजराव घोडके, गजानन तेजराव घोडके ( सर्व रा. परदरी ता. छत्रपती संभाजीनगर) यांच्याविरुद्ध पोलिसांनी ॲट्रॉसिटीचा गुन्हा दाखल केला आहे. त्यांच्याविरुद्ध राजू कडुबा काकडे (वय २७, रा. परदरी ता. छत्रपती संभाजीनगर) या तरुणाने तक्रार दिली आहे. तो पत्नी रेणुका, आई, वडील, दोन मोठे राहुल व सोमीनाथ यांच्यासोबत राहतो. त्यांची परदरी शिवारात अर्धा एकर गायरान जमीन आहे. सोमवारी सायंकाळी साडेसातच्या सुमारास राजू नेहमीप्रमाणे गावातून एक किलोमीटर अंतरावर परदरी फाट्यावर हिरकणी दूध डेअरीवर दूध घालण्यासाठी गेला होता. \

डेअरीवर दूध घालत असताना तेथे उभा रामू विठ्ठल घोडके राजूला जातिवाचक शिवीगाळ करून म्हणाला, की याला गावातील गायरान जमीन खाऊ द्यायची नाही. याला गावातून काढून द्यायचे… राजू ते ऐकून परत गावाकडे जात असताना रस्त्यात रामू घोडके व त्याचा मुलगा चिकू रामू घोडके यांनी अडवले. राजूच्या गाडीला लाथा मारून जातिवाचक शिवीगाळ केली. जीवे मारण्याची धमकी दिली. त्यावेळी तेथे नारायण तेजराव घोडके व त्याचा भाऊ गजानन तेजराव घोडके हेही आले. त्यांनीही जातिवाचक शिवीगाळ करून याला अजून मारा, याच्या XXX‍ चाकू घाला, असे म्हणत चिथावले. राजूने घरी येऊन घडलेला प्रकार सांगितला. त्यानंतर चिकलठाणा पोलीस ठाण्यात येऊन तक्रार दिली. अधिक तपास पोलीस उपअधीक्षक पूजा नांगरे करत आहेत.