अपघातानंतर महिला-पुरुषात रस्त्यातच जुंपली!; पुरुषाने शिवीगाळ केल्याने गुन्हा दाखल, जाधववाडी सिग्‍नलजवळील घटना

छत्रपती संभाजीनगर (सीएससीएन वृत्तसेवा) : कारने स्कुटीला धडक दिल्याने स्कुटीचे नुकसान झाले. स्कुटीस्वार महिलेने जाब विचारला असता कारचालकाने शिवीगाळ केली. महिलेने सिडको पोलीस ठाण्यात दिलेल्या तक्रारीवरून पोलिसांनी कारचालकाविरुद्ध गुन्हा दाखल केला आहे. रस्त्यातच काही काळ दोघांत भांडण रंगले होते.

भाग्यश्री पुरुषोत्तम आगलावे (वय ३४, रा. मयूरपार्क, छत्रपती संभाजीनगर) यांनी या प्रकरणात तक्रार दिली आहे. गुरुवारी (१९ जून) सायंकाळी साडेसहाच्या सुमारास प्लेझर स्कुटीला (एमएच २०, सीव्ही ९२९८) जळगाव रोडने त्या मयूर पार्क येथून प्रोझोन मॉल शेजारी असलेल्या त्यांच्या मुलीच्या ट्युशनकडे तिला घेण्यासाठी जात होत्या. पावणेसातच्या सुमारास जाधववाडी सिग्नलच्या पुढे कलावती लॉन्सजवळ आल्या असता त्यांच्या स्कुटीला समोरून राँगसाईडने आलेल्या कारने (एमएच २०, सीएस ८१७२) धडक दिली. त्यामुळे स्कुटीचे नुकसान झाले.

भाग्यश्री यांनी गाडी उभी करून कारचालकाला जाब विचारला, की तू राँगसाईडने गाडी आणून माझ्या गाडीला धडक देऊन सायलेन्सर का तोडले? गाडी नीट चालवता येत नाही का? त्यावर कारचालकाने त्यांना शिवीगाळ करून, तुला कोठे जायचे तेथे जा, माझी पोलीस स्टेशनला जाऊन तक्रार दे, मी कोणाला घाबरत नाही, असे म्हणून कारचालक निघून गेला. भाग्यश्री या घाबरलेल्या असल्याने त्‍यांनी शुक्रवारी (२० जून) सिडको पोलीस ठाण्यात तक्रार दिली. अधिक तपास पोलीस अंमलदार विद्या राठोड करत आहेत.