छत्रपती संभाजीनगर (सीएससीएन वृत्तसेवा) : दारू पिण्यासाठी पैसे न दिल्याने चिडून दारूड्याने युवकाच्या पोटात चाकू खुपसला. युवकावर घाटी रुग्णालयात दाखल केले असून, त्‍याची प्रकृती चिंताजनक आहे. ही घटना उस्मानपुऱ्यातील मिलिंदनगरातील गल्ली नं. ३ मध्ये रविवारी (२७ एप्रिल) सकाळी नऊला घडली.
संतोष देविदास घोरपडे (रा. मिलिंदनगर गल्ली नं. ३) असे गंभीर जखमीचे नाव आहे. त्‍याचा भाऊ विजय देविदास घोरपडे (वय ३२) याच्या तक्रारीवरून हल्लेखोर दारूडा राजू रतन खरे याच्याविरुद्ध उस्मानपुरा पोलिसांनी आज, २८ एप्रिलला गुन्हा दाखल केला आहे. संतोष व विजय हे गल्लीत उभे असताना राजू तिथे आला. त्‍याने संतोषला दारू पिण्यासाठी पैसे मागितले. संतोषने त्‍याला नकार दिला असता चिडून राजूने जवळील चाकूने त्‍याच्या पोटात भोसकले. संतोष रक्‍तबंबाळ होऊन कोसळला. विजयने त्‍याला तातडीने घाटी रुग्णालयात दाखल केले. अधिक तपास पोलीस उपनिरीक्षक अमित गोरे करत आहेत.
