छत्रपती संभाजीनगर (सीएससीएन वृत्तसेवा) : मुकुंदवाडी परिसरातील मुकुंदनगरात एका भाचाने कमालच केली. मामाकडे पाहुणा म्हणून राहायला आला आणि मामाची १४ वर्षांची मुलगी पळवून नेली. ही घटना रविवारी (२७ एप्रिल) सकाळी समोर आली आहे. मुकुंदवाडी पोलिसांनी मामीच्या तक्रारीवरून भाचाविरुद्ध गुन्हा दाखल केला आहे.
३३ वर्षीय महिलेने या प्रकरणात तक्रार दिली आहे. त्‍यांचे पती रिक्षा चालवतात. २२ एप्रिलला त्‍यांच्या चुलत नणंदेचा मुलगा नेहाल चिरंजीव भोसले हा वाशिम येथून त्याची मोटारसायकल घेऊन त्‍यांच्याकडे पाहुणा म्हणून आला होता. रविवारी सकाळी सातला सर्व जण झोपलेले असताना गाडीचा आवाज आल्याने मुलीची आई उठली. त्यांनी घराबाहेर येऊन बघितले असता नेहाल भोसले यांची मोटारसायकल दिसली नाही. त्यांनी घरात येऊन पाहिले असता नेहालसुद्धा घरात नव्हता. मोठी मुलगीही घरात नव्हती. त्यांनी पतीला झोपेतून उठवून मुलगी व नेहाल घरात नसल्याचे सांगितले. नंतर या दाम्‍पत्‍याने नेहाल व मुलीचा नातेवाइकांकडे व आजूबाजूच्या परिसरात शोध घेतला असता. मात्र दोघे कोठेही मिळून आले नाही. अखेर मामीने भाचा नेहालविरुद्ध मुकुंदवाडी पोलिसांत तक्रार दाखल केली. नेहाल याने मुलीला लग्नाचे आमिष दाखवून पळवून नेल्याचे तक्रारीत म्‍हटले आहे. मुलगी सातवीत शिकते. पोलिसांनी नेहालविरुद्ध गुन्हा दाखल केला आहे. अधिक तपास पोलीस उपनिरीक्षक पुष्पा बोचरे करत आहेत.
