छत्रपती संभाजीनगर (सीएससीएन वृत्तसेवा) : व्याजाने दिलेले पैसे व्याजासह परत करूनही शेतकऱ्याला जमीन परत करण्यास टाळाटाळ करणाऱ्या अवैध सावकार महावीर मामचंद जैन याच्यासह त्‍याच्या कुटुंबीयांविरुद्ध सातारा पोलिसांनी गुन्हा दाखल केला आहे. त्‍याच्याविरुद्ध सहकार खात्‍याने तक्रार दिली. त्‍याच्या प्रतिष्ठावरील छापेमारीत अवैध सावकारी केल्याचे अनेक कागदपत्रे जप्त करण्यात आली आहेत.
सहकार विभागाच्या सूत्रांनी दिलेल्या माहितीनुसार, सुभाष राठोड (वय ५३, रा. गारखेडा परिसर) हे उपनिबंधक कार्यालयात सहकार अधिकारी आहेत. १४ जून २०२४ रोजी सुरेश कडुबा पठाडे यांची तक्रार उपनिबंधक कार्यालयात प्राप्त झाली होती. पठाडे यांनी शेंद्रा येथील शेतजमीन ८० हजार रुपयांच्या कर्जासाठी महावीर दाम्पत्याकडे गहाण ठेवली होती. दरमहा ५ टक्के व्याज ठरले होते. कर्जाच्या बदल्यात जमिनीचे खरेदीखत करून देण्यात आले होते. मात्र खरेदीखताआधारे महावीर जैन हे सातबाऱ्याच्या उताऱ्यावर स्वतःचे नाव टाकणार नाहीत, असे ठरले होते. करारानुसार सर्व पैसे परत दिल्यानंतरही जैन यांनी जमीन परत देण्यास नकार दिला.
सहकार खात्‍याने या प्रकरणाची चौकशी केली. त्‍यात जैन याने बेकायदेशीर सावकारी व्यवसाय केल्याचे समोर आले. त्‍यामुळे व्यापारी महावीर मामचंद जैन, त्याची पत्नी सविता जैन, मुलगा सौरभ जैन यांच्याविरुद्ध महाराष्ट्र सावकारी कायद्यानुसार सातारा पोलीस ठाण्यात तक्रार देण्यात आली. या तक्रारीवरून पोलिसांनी तिघांविरुद्ध गुन्हा दाखल केला आहे. पोलिसांत तक्रार देण्यात आल्यानंतर लगेचच सहकार विभागाच्या अधिकाऱ्यांनी जैनच्या वर्धमान गारमेंट्‌स व अन्य प्रतिष्ठानावर छापा मारला. शेकडो व्यवहारांची नोंद असलेली मोठी लाल डायरी, विविध जमिनींचे खरेदीखत, त्यांचे पुरावे, सावकारीतून वसूल केलेल्या रकमेच्या पावत्या, सातबारा उतारे व जमीन विक्री व्यवहारांचे दस्तावेज, कोरे बाँड व हमीपत्रे, विविध लोकांच्या नावे असलेली कर्जाची खाती व व्यवहार नोंदी छाप्यादरम्यान मिळून आल्याचे सहकार विभागाच्या सूत्रांनी सांगितले.
