छत्रपती संभाजीनगर (सीएससीएन वृत्तसेवा) : चालकाने उभ्या कारचा दरवाजा अचानक उघडल्याने तिथून मोपेडवर जाणारी डॉक्टर महिला व तिची लहान मुलगी जखमी झाली. ही घटना मंगळवारी (२ जुलै) सायंकाळी साडेपाचच्या सुमारास उल्कानगरीतील आदिनाथ प्रेसिडिओ बिल्डिंगसमोर घडली.
डॉ. वृंदा विजय राठी (वय ४७, रा. प्लॉट क्र. सी १०२, ऑगस्ट होम, उल्कानगरी) या त्यांच्या लहान मुलीला मोपेडवर विभागीय क्रीडा संकुल येथे खेळण्यासाठी सोडायला निघाल्या होत्या. कारचालकाने (क्र. एमएच २० बीवाय ०४१७) अचानक कारचा दरवाजा उघडला. त्याला धडकून वृंदा व त्यांची मुलगी दोघी पडल्या. मुलगी किरकोळ जखमी झाली तर वृंदा यांच्या डाव्या हाताला फॅक्चर झाले. डोक्याला देखील मार लागला. जवाहरनगर पोलिसांनी कारचालकाविरुद्ध गुन्हा दाखल केला आहे.
