छत्रपती संभाजीनगर (सीएससीएन वृत्तसेवा) : छत्रपती संभाजीनगरमध्ये भाजप महिला मोर्चाच्या शहराध्यक्षा आणि सरचिटणीसमध्ये रस्त्यावरच बुधवारी (३१ जुलै) दुपारी जोरदार ढिश्यूमऽऽ ढिश्यूमऽऽ झाली. प्रकरण क्रांतीचौक पोलीस ठाण्यापर्यंत गेले. हर्षवर्धन कराड, जालिंदर शेंडगे यांनी दोन्ही पदाधिकाऱ्यांची समजूत काढल्यानंतर तक्रार देण्यात आली नाही. मात्र ही घटना शहरात चर्चेचा विषय ठरत आहे.
सध्या भाजपकडून विधानसभा निवडणुकीची तयारी सुरू झाली आहे. यानिमित्ताने राज्य विस्तारकांचा वर्ग आयएमए हॉलमध्ये राष्ट्रीय सहसंघटन मंत्री शिवप्रकाश, प्रदेशाध्यक्ष चंद्रशेखर बावनकुळे, प्रदेश सरचिटणीस संजय केणेकर, संघटनमंत्री रघुनाथ कुलकर्णी, विभागीय संघटन मंत्री संजय कौडगे यांच्या मार्गदर्शनाखाली झाला. राज्यातील १४० विस्तारक उपस्थित होते. भाजप महिला मोर्चाच्या शहर सरचिटणीस महिलेने शहराध्यक्षांनी आपल्याकडून अडीच लाख रुपये हातउसणे घेतल्याचे सांगून त्‍या आता आपला फोन उचलत नसल्याची तक्रार प्रदेशाध्यक्ष बावनकुळे यांच्याकडे केली. तेवढ्यात शहराध्यक्षा तिथे आल्या.
बावनकुळे यांनी दोघींचे म्हणणे ऐकून घेतले. त्यानंतर हॉलमधून परतत असताना शहराध्यक्षांनी सरचिटणीस महिलेला पकडले आणि मारहाण केली. दोघींकडून जोरदार शिवीगाळ करत हाणामारी झाली. अन्य महिला पदाधिकाऱ्यांनी त्‍यांचे भांडण सोडले. यात एकीच्या चेहऱ्यावर तर दुसरीच्या हाताला जखमा झाल्या आहेत. हा प्रकार बावनकुळे यांना कळताच त्‍यांनी जालिंदर शेंडगे यांना दोघींकडे पाठविले. मात्र तोपर्यंत दोन्ही गट क्रांतीचौक पोलीस ठाण्यात तक्रार देण्यासाठी गेले. शेंडगे आणि हर्षवर्धन कराड यांनी सगळा प्रकार काय आहे, हे समजून घेऊन वरिष्ठांना सांगण्यात येईल, त्यानंतर कारवाईचा निर्णय होईल, असे सांगत दोघींची समजूत काढली. त्‍यामुळे पोलिसांत तक्रारी दाखल झाल्या नाहीत.
घटनेबाबत भाजपचे शहराध्यक्ष शिरीष बोराळकर म्हणाले, की मारहाण कुणामध्ये व का झाली हे बाब समजून घेतल्यानंतर कारवाई केली जाईल. मारहाण झालेली सरचिटणीस म्हणाली, की शहराध्यक्षांसोबत मी सावलीसारखे होते. माझ्याशी त्यांचा वैयक्तिक पैशाचा व्यवहार होता. त्यांच्या गटबाजीच्या राजकारणाला कंटाळून आम्ही चार सरचिटणीस अंतर ठेवायला लागलो. शहर महिला आघाडीचे अध्यक्षपद जात असल्याची त्यांना जाणीव झाली. याला मी कारणीभूत आहे असे त्यांना वाटू लागल्याने हल्ला केला. महिला मोर्चा शहराध्यक्षांची प्रतिक्रिया मिळू शकली नाही.
