पैठण (सीएससीएन वृत्तसेवा) : पैठण शहरातील भवानीनगर परिसरात व्यापाऱ्याला अडवून डोळ्यात मिरचीची पूड फेकून चोरट्यांनी १० लाख रुपये असलेली बॅग घेऊन सिनेस्टाइल धूम ठोकली होती. १३ मार्चला रात्री ८:३० च्या सुमारास ही घटना घडली होती. स्थानिक गुन्हे शाखेच्या पथकाने थेरगाव (ता. पैठण) शिवारात सोमवारी (१७ मार्च) दुपारी दोनच्या सुमारास चोरट्यांपैकी एकाला सिनेस्टाइल पाठलाग करून पकडले.
द्वारकानाथ ऊर्फ राजेंद्र श्रीकिसन सारडा (वय ६२) यांचे पैठणमध्ये पंकज ट्रेडर्स नावाचे होलसेल किराणा दुकान आहे. १३ मार्चच्या रात्री ८:३० ला दुकान बंद करून ते स्‍कुटीने घरी येत होते. दहा लाख रुपयांची रक्कम असलेली बॅग त्‍यांच्यासोबत होती. भवानीनगर परिसरातील शमी गणपती मंदिराजवळ आल्यानंतर दुचाकीवरून आलेल्या चोरट्यांनी त्यांची स्कूटी अडविली. त्यानंतर सारडा यांच्या डोळ्यात मिरचीची पूड फेकली. पैशांची बॅग हिसकावून धूम ठोकली. या प्रकरणी पैठण पोलिसांनी गुन्हा दाखल केला होता. स्थानिक गुन्हे शाखेचे पोलीस निरीक्षक सतीश वाघ, सहायक पोलीस निरीक्षक पवन इंगळे, सहायक फौजदार लहू थोटे, जमादार नामदेव शिरसाठ यांच्या पथकाने पाचोड येथे दुचाकीवरून आलेला सुभाष ऊर्फ ईटिशन ऊर्फ पप्पा वरज्या भोसले याला ६ किलोमीटर पाठलाग करून थेरगाव शिवारात पकडले. पोलिसांनी त्याची कसून चौकशी केली असता त्याने लुटीची कबुली दिली. पोलिसांनी त्याच्याकडून ४० हजार रुपये जप्त केले. त्‍याच्या साथीदारांचा शोध घेतला जात आहे.
