छत्रपती संभाजीनगर (सीएससीएन वृत्तसेवा) : विमानतळाच्या आजूबाजूच्या परिसरात असणारे फार्म हाऊस, मंगल कार्यालय येथील विवाह सोहळा तसेच अन्य सामाजिक कार्यक्रमांत लेझर लाईटस, बीम लाईट्‌सच्या वापरावर बंदी घालण्याचे आदेश पोलीस आयुक्त प्रवीण पवार यांनी निर्गमित केले आहेत.
आदेशात म्हटले आहे की, पोलीस आयुक्तालय हद्दीतील सर्व फार्म हाऊस, मंगल कार्यालय, विवाह सोहळा, सामाजिक कार्यक्रम आदींच्या आयोजक, मालक यांनी लेझर लाईट्स, बीम लाईट्स याचा वापर करू नये. कारण असा वापर केल्यामुळे पायलटच्या दृश्यात अडथळा निर्माण होऊन लँडींग व टेकऑफ करण्यापूर्वी लक्ष विचलित होऊन दुर्घटना होण्याची शक्यता नाकारता येत नाही. या आदेशाचे उल्लघंन करणाऱ्यावर कडक कायदेशीर कारवाई करण्यात येईल व तो शिक्षेस पात्र राहील,असेही आदेशात स्पष्ट केले आहे.
