छत्रपती संभाजीनगर (सीएससीएन वृत्तसेवा) : छत्रपती संभाजीनगरचे प्रसिद्ध उद्योजक मनीष धूत यांना १ कोटी ५ लाखांनी गंडा घालण्यात आल्याचा प्रकार समोर आल्याने खळबळ उडाली आहे. दिल्लीच्या इरिषा ॲग्रीटेक प्रा. लि. च्या संचालकांनी आमच्या कंपनीची मराठवाड्यासाठी डिस्ट्रिब्यूटरशिप घ्या म्हणून धूत यांना विनंती केली होती. त्यानंतर मात्र परस्पर धूत यांच्या नावाचा गैरवापर करून मराठवाड्यात डीलर नेमले व या डिलर्सकडून लाखो रुपये उकळले. ही बाब धूत यांना कळल्यानंतर त्यांनी बुधवारी (९ जुलै) या प्रकरणी वेदांतनगर पोलीस ठाण्यात तक्रार दिली. या तक्रारीवरून इरिषा अॅग्रीटेक कंपनीचे दर्शनसिंग राणा, त्यांचा मुलगा सुधीर राणा, समूह अध्यक्ष परमिंदर सिंग बवेजा, मनीष कुमार यांच्याविरुद्ध फसवणुकीचा गुन्हा दाखल केला आहे.
अशी झाली फसवणूक…
-डिसेंबर २०२१ मध्ये किरण इंदूलकर, उमेश मुलमुले यांनी धूत यांची भेट घेतली. इरिषा कंपनीची ओळख सांगून रशियाच्या बेलारूस कंपनीचे शेती उपयोगी अवजारे कंपनी उत्पादित करत असल्याचे त्यांनी सांगितले.
-डिस्ट्रिब्युटरशिप घेण्याची गळ घातली. सुरुवातीला धूत यांनी नकार दिला. मात्र, विविध आश्वासने देत त्यांनी धूत यांना राजी केले. त्यानंतर धूत यांनी दिल्लीला जाऊन कंपनीची पाहणीही केली होती.
-राणाने धूत यांना आधी डीलर नेमण्याचा अधिकार दिला होता. त्यानुसार मराठवाड्यासह बुलडाणा जिल्ह्यात धूत हे डीलर नेमणार होते. मात्र पैसे मिळताच त्याने धूत यांच्या नावाचा गैरवापर करून कंपनीने सिल्लोड, परळी येथे परस्पर डीलर नेमले.
-सांगितल्याप्रमाणे विविध टक्केवारी, अनामत रकमेवरील व्याजाचे आश्वासनदेखील पाळले नाही.
-धूत यांनी कंपनीची अधिक चौकशी केली असता उत्पादन विक्री दरम्यान राणाच्या कंपनीला ऑटोमोटिव्ह रिसर्च असोसिएशन ऑफ इंडियाची परवानगीच नसल्याचेही समोर आले. यामुळे त्यांच्या कुठल्याच उत्पादनाला चेसीस क्रमांक नसून आरटीओ पासिंगच मिळणार नव्हती.
उडवाउडवीची उत्तरे…
गैरप्रकार समोर आल्याने धूत यांनी आरोपींशी वारंवार संपर्क केला. मात्र, त्यांनी उडवाउडवीची उत्तरे दिले. अनेक डीलरकडून डिलरशिपसाठी लाखो रुपये उकळल्याचेही धूत यांना कळले. धूत यांनी सुरुवातीला दिलेली उत्पादने कंपनीला परत केली. मात्र, तरीही कंपनीने रक्कम दिली नाही. त्यामुळे धूत यांनी कायदेशीर कारवाईचा निर्णय घेतला. पोलीस निरीक्षक प्रवीणा यादव, पोलीस उपनिरीक्षक विनोद मोरे याप्रकरणी अधिक तपास करत आहेत.
