वाळूज महानगर (सीएससीएन वृत्तसेवा) : वाळूज महानगरातील स्टरलाइट चौकात आज, २४ फेब्रुवारीला दुपारी २ च्या सुमारास स्मार्ट सिटी बस आणि खासगी स्कूल बसची धडक होऊन तीन विद्यार्थी किरकोळ जखमी झाले. विद्यार्थ्यांवर खासगी रुग्णालयात उपचार करण्यात आले.
स्टरलाइट चौकात वाढत्या अतिक्रमणांमुळे अपघात नित्याचेच झाले आहेत. रांजणगाव शेणपुंजी येथून छत्रपती संभाजीनगर शहराकडे निघालेल्या स्मार्ट सिटी बसने (क्र. एमएच २० ईएल ०२७९) समोरून येणाऱ्या पोदार शाळेच्या बसला (क्र. एमएच २० जीसी ०९९७) धडक दिली. यात स्कूलबसच्या काचा फुटून विद्यार्थ्यांना लागल्याने ३ विद्यार्थी किरकोळ जखमी झाले.
त्यांना नागरिकांनी धावून खासगी रुग्णालयात दाखल केले. अपघाताची माहिती मिळताच पालकांनी रुग्णालयात गर्दी केली. सुदैवाने कुणालाही गंभीर दुखापत नसल्याचे कळल्यावर त्यांनी मोकळा श्वास घेतला. प्रत्येक स्कूल बसला जाळ्या लावण्याचे आदेश आहेत. मात्र पोदार इंग्रजी शाळेच्या या बसला जाळ्या नसल्याने काचा फुटून विद्यार्थ्यांना किरकोळ दुखापत झाली. दरम्यान, सिटीबस चालकाविरुद्ध वाळूज एमआयडीसी पोलीस ठाण्यात गुन्हा दाखल करण्याची प्रक्रिया वृत्त लिहीपर्यंत सुरू होती.
