छत्रपती संभाजीनगर (सीएससीएन वृत्तसेवा) : शहरात चोरीच्या वाढत्या घटनांमुळे नागरिक हैराण आहेत. दुसरीकडे पोलीस मात्र चोऱ्यांवर पांघरूण घालण्याचा प्रकार करत असल्याचे समोर आले आहे. देवळाईच्या म्हाडा कॉलनीतून रिक्षा चोरीला गेली. त्‍याची तक्रार घेऊन चिकलठाणा पोलीस ठाण्यात गेलेल्या रिक्षाचालकाची तक्रारच घेण्यात आली नाही. १८ फेब्रुवारीला घडलेल्या या घटनेत अद्याप गुन्हा दाखल नाही. त्‍यामुळे रिक्षाचालकाने पोलीस अधीक्षक कार्यालयात धाव घेऊन लेखी अर्ज देत उदरनिर्वाहाचे एकमेव साधलेली रिक्षा शोधून देण्यासाठी साकडे घातले आहे.
नक्‍की काय घडले?
चिकलठाण्याच्या हनुमान चौकात ईश्वर आगळे हे रिक्षाचालक राहतात. त्‍यांच्या मालकीची एमएच २० ईएफ ४३८३ ही रिक्षा आहे. रिक्षा चालवून ते कुटुंबाचा उदरनिर्वाह करतात. सध्या घराचे बांधकाम सुरू असल्याने ते आपली रिक्षा देवळाईतील म्हाडा कॉलनीत त्‍यांच्या मित्राच्या घराजवळ उभी करत होते. १८ फेब्रुवारीला पहाटे तीनच्या सुमारास ही रिक्षा चोरीला गेली. सकाळी आठला ही बाब लक्षात आल्यानंतर त्‍यांच्या मित्राने आगळे यांना कॉल करून सांगितले. त्‍यानंतर आगळे हे ताबडतोब मित्राच्या घराकडे गेले. दोघांनी मिळून परिसरात शोध घेतला. त्‍यानंतर मित्राच्या घराजवळील सीसीटीव्ही कॅमेऱ्याचे फूटेज तपासले असता त्‍यात दोन-तीन जण रिक्षा लोटत लोटत घेऊन जाताना दिसत आहेत.
त्‍यानंतर मित्रासोबत येऊन आगळे यांनी चिकलठाणा पोलीस ठाण्यात तक्रार दिली. तिथे पोलीस अंमलदार श्रीमती जाधव यांना घडलेली हकीकत सांगितली. त्‍यांनी चक्‍क तक्रार घेण्यास नकार दिला आणि साध्या पेपरवर नोंद करून घरी जायला सांगितल्याचा धक्कादायक प्रकार समोर आला आहे. १९ फेब्रुवारीला आगळे यांनी पोलिसांना विचारणा केली, मात्र त्‍यांनी उत्तर दिले नाही. २० फेब्रुवारीलाही पोलिसांनी गुन्हा दाखल करण्यास नकार दिल्याचे तक्रार अर्जात म्‍हटले आहे.
वरिष्ठ पोलीस अधिकाऱ्यांच्या सूचनेकडे दुर्लक्ष
विशेष पोलीस महानिरीक्षक आणि पोलीस अधीक्षकांनी वारंवार तक्रारदाराला देण्यात येणाऱ्या वागणुकीबद्दल सूचना केल्या आहेत. मात्र त्‍याकडे चिकलठाणा पोलिसांनी दुर्लक्ष केल्याचे दिसून येत आहे. चोरीची तक्रार का घेतली जात नाही, याप्रकरणात गुन्हा का दाखल केला नाही, याबद्दल सामान्यांना प्रश्न पडला आहे. दरम्‍यान, ईश्वर आगळे यांनी नागरिकांना आवाहन केले आहे, की माझी एमएच २० ईएफ ४३८३ क्रमांकाची रिक्षा कुठेही दिसून आल्यास नागरिकांनी कृपया 9175012217 या क्रमांकावर कॉल करावा.
