छत्रपती संभाजीनगर (सीएससीएन वृत्तसेवा) : हडको एन ११ नवजीवन कॉलनीतून १६ वर्षीय मुलाच्या अपहरणाची घटना समोर आल्याने खळबळ उडाली आहे. सिडको पोलिसांनी अपहरणाचा गुन्हा दाखल करून त्‍याचा शोध सुरू केला आहे. ही घटना सोमवारी (१७ फेब्रुवारी) सकाळी साडेनऊला समोर आली.
४२ वर्षीय व्यावसायिकाने या प्रकरणात तक्रार दिली आहे. सकाळी साडेनऊच्या सुमारास व्यावसायिक घरी आले असता त्‍यांनी मुलगा कुठे आहे, असे पत्‍नीला विचारले. तो वरच्या रूममध्ये असल्याने पत्नीने सांगितल्याने त्‍यांनी वरच्या रूममध्ये जाऊन पाहिले असता मुलगा दिसून आला नाही. त्‍यांनी खाली येऊन परत पत्‍नीला विचारले असता मुलगा काहीच न सांगता घरातून निघून गेल्याचे समोर आले. त्‍याचा आजूबाजूला, परिसरात, नातेवाइकांकडे, मित्रांकडे शोध घेण्यात आला. मात्र तो मिळून आला नाही. अखेर सिडको पोलिसांत अपहरणाची तक्रार नोंदविण्यात आली. त्‍याने सोबत मोबाइल नेला आहे. अधिक तपास पोलीस उपनिरीक्षक अनिल नानेकर करत आहेत.
